Viðgerð á Blákrossheiminum
Blákrossheimið í Tórshavn er ein viðgerðarstovnur fyri fólk við
rúsdrekkatrupulleikum. Heimið byrjaði virksemi sítt í 1984 og er góðkent
sum viðgerðarstovnur av Føroya Landsstýri.
Á Blákrossheiminum, ið hevur pláss fyri 15 innskrivaðum í senn,
starvast leiðari, sálarfrøðingur, lækni, sjúkrasystir, sjúkrahjálpari,
prestur og fleiri onnur hjálparfólk við royndum innan viðgerð av
rúsevnismisnýtslu.
Á heiminum fæst avrúsing, viðgerð og eftirviðgerð. Dentur verður
lagdur á trivnað og góðan felagsskap í kristnum umhvørvi við samrøðum,
samanspæli og samveru.
Eftirviðgerð:
Fyri at fylgja upp og styrkja
úrslitið av viðgerðini, bjóða vit ymisk sløg av eftirviðgerð, soleiðis
at aftaná viðgerð ber til at koma til samrøður og í bólk og arbeiða
víðari frá teirri nýggju byrjan, ið sjálv viðgerðin vónandi gjørdist.
Hesa eftirviðgerð bjóða vit í upp til eitt ár.
Ambulant viðgerð:
Rúsevnismisnýtarar,
avvarðandi ella onnur, ið ikki vilja ella hava fyri neyðini at verða
innskrivað á heimið, eru altíð vælkomin at ringja til okkum og avtala
eina tíð til samtalu.
Familjuviðgerð:
Rúsevnismisnýtarar ávirka alla familjuna; tí leggja vit eisini
stóran dent á, at øll familjan hevur møguleika at tosa við okkum og fáa
vegleiðing og stuðul.
Les meira um viðgerðina á Blákrossheiminum í skjalinum niðanfyri.